Fabrizio Romano oo ah saxafiga caanka ah ee reer Talyaani ee ku takhasusay wararka suuqa kala iibsiga ciyaartoyda ayaa shaaca ka qaaday mustaqbalka xiddiga Sadio Mane ee kooxda Bayern Munich.
Xiddiga reer Senegal Sadio Mane ayaa u dhaqaaqay kooxda Bayern Munich intii lagu jiray suuqii xagaaga ee ugu dambeeyay isaga oo ka tagay Liverpool.
Xiddiga ayaa la filayay in uu qaab ciyaareed fiican ku soo bandhigo Bayern laakiin waxa uu si weyn ugu dhibaatooday in uu la qabsado horyaalka Bundesliga.
Fabrizio Romano ayaa ku muujiyay bogiisa rasmiga ah ee shabakada bulshada ee “Twitter” in wadahadalo dhexmaray maamulka Bayern Munich iyo ciyaaryahanka laftiisa si loo caddeeyo arrimaha qaar ka dib xilli ciyaareedkiisii ugu horeeyay ee Bavarian.
Saxafiga caanka ah ayaa intaa ku daray in Sadio Mane uu doonayo in uu sii joogo Bayern Munich oo aanu ku fikirin in uu ku soo laabto tartanka English Premier League isaga oo rajaynaya in uu koobab kula guulaysto kooxdiisa Bayern Munich xilli ciyaareedka dambe.
Related